您的購物袋內沒有商品！
會員中心
收藏
訂單記錄
Arcade Fire 最為人所知嘅歌唔會係呢首，但係呢首〈No Cars Go〉於我特別深刻。我仲記得當時係地鐵車廂之內，駛過觀塘天橋，沿前進方向嘅右邊窗望去，見住創紀之城嘅一幕幕玻璃向後緩緩後退，車身就好似進入緊另一個次元嘅世界咁。
「We know are place where no cars go」我望返車廂入面一個個各自為政嘅人、有老有嫩，近乎厭惡嘅陌生感湧上心頭。聽住歌詞，我心頭浮現左一個好奇怪嘅景像：整個車廂脫軌而不墜，係空中一直行駛，帶成架車嘅人去一個無路可到嘅地方。
然後我問自己，我準備好同呢班素未謀面嘅人一齊去呢個無可達到嘅目的地未?呢班人又係唔係我可以結伴同行嘅「We」呢?我直認不諱答案係否認的，憑咩要我同呢班人同喜共憂，我又有咩資格要佢地carry我，我搵唔到同呢堆人嘅connection。
好似係3、4年前嘅事，個時出街仲未駛戴口罩，個個夏天仲未開始大煙......
2022年嘅9月，Side Space 展出左 Richie Culver嘅作品﹐大大隻字寫住Hong Kong Is Boring，大字報咁嘲笑香港悶，但係在地人們又好似不得不否認呢句statement，我心入面有啲唔忿氣。
「Us Kids Know!」我再次聽到呢到，突然我又會想真係有個架唔按軌道行嘅列車存在，架車會載滿我認識嘅人們：玩樂團的band仔們、搞放映、寫藝評、搞讀書會、寫劇本拍片、插畫animation、錄podcast嘅朋友們，全部都係難以維生又攞自己黎搞嘅事黎，但係全部全部都好有趣。我願意同呢班人一齊搭呢架車、一齊流啲傻勁嘅汗水，好似睇show嘅時候咁。
而呢首歌最精彩嘅地方，係話我地知有個未知地方要去後，「Let's go! Babies needing cribs, Let's go!」，條路係要靠唔識性嘅大細路行出路。行動，係打破沉悶嘅最佳方法，就好似莫生氣係 Richie Culver作品前面放左個鎚仔作為回應咁。
香港可能好悶，但係我認識嘅香港人are not。
-梅迪斯
